Приведутся Царю девы в след Ея. Приведутся в веселии и радовании, введутся в храм Царев.
"Днесь в храм приводится Всенепорочная Дево, во обителище Всецаря Бога, и всея жизни нашея питателя: днесь чистейшая святыня, яко трилетствующая Юница, во святая святых вводится. Той возопиим, яко Ангел: радуйся, Едина в женах Благословенная.
Днесь боговместимый храм Богородица в храм Господень приводится, и Захариа Сию приемлет: днесь святая святых радуются, и лик Ангельский таинственно торжествует. С нимиже и мы празднующе днесь, с Гавриилом возопиим: радуйся, Благодатная, Господь с Тобою, имеяй велию милость.
Храм и Палата, и Небо одушевленное явльшися, Богоневесто Царева, во храм законный приводима днесь, Тому соблюдаема, Пречистая.
Нескверная Агница, и Чистая Голубица приведеся обитати в Дом Божий, яко Непорочная, пронареченная быти Мати Божия.
Свещеносицы девы, Приснодеву светло провождающе, пророчествуют истинно Духом будущее: храм бо Божий Богородица сущи, в храм со славою девственною младенствующи вводится.
Девы ликовствуйте свещеносицы, начните днесь: воспойте Царице Матери, приходящей в храм Царя Христа.
Днесь собори верных сошедшеся, духовне да торжествуим, и Богоотроковицу Деву и Богородицу, в храм Господень Приводиму, благочестно восхвалим, Предъизбранную от всех родов во обителище всех Царя Христа и Бога: девы свещы носяще предъидите, Приснодевы чтуще честное происхождение: матери печаль всю отложивше, радостно споследствуйте Матери Бога Бывающей, и радости мира Ходатаице. Вси убо радостно, еже радуйся, со Ангелом возопиим Обрадованней, присно Молящейся о душах наших.
Днесь Храм Одушевленный Святыя славы Христа Бога нашего, Едина в женах Благословенная Чистая приводится в Храм Господень жити во Святых: и радуются с Нею Иоаким и Анна духом, и девственнии лицы Господеви поют, псаломски воспевающе и чтуще Матерь Его.
"Престол Твой, Боже, в век века: жезл правости, жезл Царствия Твоего.
Возлюбил еси правду и возненавидел еси беззаконие, сего ради помаза Тя, Боже, Бог Твой елеем радости, паче причастник Твоих.
Смирна и стакти и кассиа от риз Твоих, от тяжестей слоновых, из нихже возвеселиша Тя.
Дщери царей в чести Твоей, предста Царица одесную Тебе, в ризах позлащенных одеяна преиспещрена.
Слыши, Дщи, и виждь, и приклони ухо Твое, и забуди люди Твоя, и дом отца Твоего.
И возжелает Царь доброты Твоея: зане Той есть Господь Твой и поклонишися Ему.
И дщи Тирова с дары, лицу Твоему помолятся богатии людстии.
Вся слава Дщере Царевы внутрь, рясны златыми одеяна и преиспещрена.
Приведутся Царю девы в след Ея, искренния Ея приведутся Тебе.
Приведутся в веселии и радовании, введутся в храм Царев.
Вместо отец Твоих быша сынове Твои: поставиши я князи по всей земли.
Помяну имя Твое во всяком роде и роде.
Сего ради людие исповедятся Тебе в век и во век века." (Псалом 44.)
Возопий, Давиде, что сей настоящий праздник, Юже воспел еси иногда в книзе псаломстей, яко Дщерь Богоотроковицу и Деву. Приведутся, рече, Царю таинственно девы во след Ея, ближнии Ея: дивен соделай и всемирен праздник зовущим: Богородица нам предста, спасения Ходатаица.
Ангели, взыграйте со святыми, девы, сликовствуйте: Богоотроковица бо вниде во святая святых.
Ангели, вхождение Пречистыя зряще, удивишася, како Дева вниде во святая святых.
Яко одушевленному Божию Кивоту, да никакоже коснется рука скверных, устне же верных Богородице немолчно глас Ангела воспевающе, с радостию да вопиют: истинно вышши всех еси, Дево Чистая.
Величай, душе моя, Честнейшую и Славнейшую горних воинств, Деву Пречистую Богородицу.
Херувим пребольши, и Серафим вышши, и ширши небес явилася еси, Дево, яко невместнаго всеми, во утробе вместивши Бога нашего, и рождши несказанно."
(Из Богослужения празднику Введения во Храм Пресвятой Богородицы.)