(no subject)
Old English Rune Poem
Feoh byþ frōfor · fīra gehwilcum
Sceal þēah manna gehwilc · miclan hit dælan
gif he wille for dryhtne · dōmes hlēotan
Ūr byþ ānmōd · and oferhyrned
felafrēcne dēor · feohteþ mid hornum
mære mōrstapa · þæt is mōdig wiht
Þorn byþ ðearle scearp · þegna gehwilcum
onfeng is yfel · ungemetum rēþe
manna gehwilcum · þe him mid resteð
Ūs byþ ordfruma · ælcre spræce
wīsdomes wrāþu · and wītena frofōr
and eorla gehwām · ēadnes and tōhiht
Rād byþ on recede · rinca gehwilcum
sēfte, and swīþhwæt · þām þe sitteþ on ufan
meare mægenheardum · ofer mīlpaþas
Cēn byþ cwicera gehwām · cūþ on fȳre
blāc and beorhtlic · bierneþ oftost
þær hīe æþelingas · inne restaþ
Giefu gumena byþ · gleng and herenys
wrāþu and wyrþscype · and wræcna gehwām
ār and ætwist · þe byþ ōþra lēas
Ƿ (Wynn) ne brūceþ · þe can wana lȳt
sāres and sorge · and him selfa hæfþ
blæd and blysse · and ēac burga geniht
Hægl byþ hwītost corna · hwyrft hit of heofones lyfte
wealcaþ hit windes scūras · wyrþeþ hit tō wætere syððan
Nyd byþ nearu on brēostan · weorþeþ hīe þeah oft nīþa bearnum
tō helpe and tō hæle gehwæþre · gif hīe his hlystaþ æror
Īs byþ oferceald · ungemetum slidor
glisnaþ glæshlūtor · gimmum gelīcost
flōr forste geworuht · fæger ansīene
Gēr byþ gumena hiht, · þonne god læteþ
hālig heofones cyning · hrūsan sellan
beorhte blēda · beornum and þearfum
Ēoh byþ ūtan · unsmēþe trēow
heard, hrūsan fæst · hierde fyres
wyrtruman underwreþed · wynn on ēþle
Peorþ byþ symble · plega and hleahtor
wlancum · þar wigan sittaþ
on bēorsele · blīþe ætsamne
Eolhx secg eard hæfþ · oftost on fenne
weaxe on wætere · wundaþ grimme
blōde breneð · beorna gehwilcne
þe him ænigne · onfeng gedēð
Sigel sæmannum · simble biþ on hihte
þonne hīe hine fēriaþ · ofer fisces bæþ
oþ hīe brimhengest · bringeþ tō lande
Tir byþ tācna sum · healdeð trēowa wel
wiþ æþelingas · ā biþ on færylde
ofer nihta genipu · næfre swīceþ
Beorc byþ blēda lēas, · bereþ efne swā þēah
tānas būtan tūdor · biþ on telgum wlitig
hēah on helme · hrysted fægere
gehlōden lēafum · lyfte getenge
Ēh byþ for eorlum · æþelinga wynn
hors hōfum wlanc · ðær him hæleþ ymbe
welege on wicgum · wrixlaþ spræce
and biþ unstyllum · æfre frofur
Mann byþ on myrgþe · his māgan lēof
sceal þēah ānre gehwilc · ōðrum swīcan
for þām dryhten wille · dōme sīne
þæt earme flæsc · eorþan betæcan
Lagu byþ lēodum · langsum geþūht
gif hīe sculun nēþan · on nacan tealtum
and hīe sæȳþa · swīþe brēgaþ
and sē brimhengest · brīdles ne gīemeð
Ing wæs ærest · mid Eastdenum
gesewen secgun · oþ hē siððan eft
ofer wæg gewāt · wæn æfter ran
þus heardingas · þone hæle nemdon
Dæg byþ dryhtnes sond, · dēore mannum
mære metodes lēoht · myrgþ and tōhiht
ēadgum and earmum · eallum bryce
Ēðel byþ oferleof · æghwylcum men
gif hē mōt þær rihtes · and gerisena on
brūcan on bolde · blædum oftost
Āc byþ on eorþan · ielda bearnum
flæsces fōdor · fēreþ gelōme
ofer ganotes bæþ · gārsecg fandaþ
hwæþer āc hæbbe · æþele trēowe
Æsc byþ oferhēah · ieldum dēore
stiþ on staþole · stede rihte hielt
þēah him feohtan on · fīras manige
Ȳr byþ æþelinga · and eorla gehwæs
wynn and weorþmynd · biþ on wicge fæger
fæstlīc on færelde · fyrdgeatewa sum
Īor byþ ēafisc, · and þēah a brūceþ
fōdres on foldan · hafaþ fægerne eard
wætre beworpen · þær hē wynnum lēofaþ
Ēar byþ egle · eorla gehwilcun
þonn fæstlice · flæsc onginneþ
hræw cōlian · hrūsan ceosan
blāc to gebeddan · blēda gedrēosaþ
wynna gewītaþ · wera geswīcaþ