Праблема ці не праблема, але напісаньне сучаснай даты даецца са складанасьцямі - упартая адзінка ніяк ня ставіцца між нулямі. Рука працягвае маляваць звычайныя 2009, тыя звычайныя і вельмі няўдалыя 2,0,0,9. Адпусьціце ж вы ўжо нарэшце.

Пералічыўшы ўвесь наяўны асартымэнт жоўтай прэсы, гандляр у электрычцы спыніўся, пераглянуўся і таямніча прамовіў: "таксама магу прапанаваць сродкі супраць грыпа і мышэй". Прасторавая фармулёўка пагрузіла мяне ў развагі аб унівэрсальнасьці. Вось прыняў сабе адзін сродак і ні грыпа, ні мышэй.

Не знайсьці мне спакою на гэтай плянэце. Узяў бы квіток на які Марс, ды ў адзін канец. Раз на год жаданьне ўзьнікае стабільна.

Ах, яна на мяне ня так паглядзела! Ой, ён пра мяне ня тое падумаў! Дастала слухаць. Мы ёсьць тым, што мы пра сябе ўяўляем. А тое, што іншыя думаюць пра цябе - гэта выключна іхныя праблемы.

Люблю вясну, бо за ёй прыходзіць лета. А вось да лета маю скепсыс. Мне яго мала і сканчаецца яно восеньню.

Празь дзень нехта падыходзіць прасіць грошы. Ня дзіва, што не хапае, як правіла, на бутэльку. Бывае ня проста просяць, але патрабуюць. Калі ж адмаўляеш - робяць выгляд, што ты першы злачынца на плянэце, бессардэчная пачварына. Вось ідзе бруднаваты панк з даволі мілага выгляду дзяўчынай. Падыходзяць, панк адкрыта просіць на піва з чыпсамі [запросы ( Read more... )

Апошнія некалькі дзён нагадвалі бесьперапынныя заплывы на даўгія дыстанцыі. Ня буду хаваць, апакаліптычных колераў неба і вада вадаспадам зь яго прынесьлі нямала пазытыўных эмоцыяў, як-ніяк рэдка выпадае праплыць па вуліцах роднага горада. З нэгатыўных, хіба дробязі - зламаны тэлефон, расклеяны абутак, у той час як у кагосьці паплыў дом. Апафэозам  ( Read more... )

У пакоі водар кавы і араматычных палачак. Зноў сам на сам з сабою. Адольвае нясьцерпнае жаданьне зьнікнуць, стаць нябачным прывідам. Вандраваць па сьвеце маўкліва назіраючы за жыцьцём іншых. Быць тваім сябрам і ніколі ня быць тваім.

Спам прапанаваў павялічыць жыцьцё на 30%. Ужо нешта новае, бо раней прапаноўваў павялічыць зусім іншае.
Сусед падзяліўся рэцэптам захаваньня бутэлькі піва на некалькі дзён: "проста ставіш у лядоўню і ня п'еш". Па-мойму, геніяльна.

Апошнія зімы мінаюць з надзвычайным скрыпам. Гэтым сонечным дням радуюся бязьмежна. Пазаўчора прыяцель даслаў sms, віншаваў зь вясною. Але як высьветлілася не мяне, а сваю дзяўчыну. Уяўляю, як можна было нас пераблытаць. Тэлефоніў потым, прабачэньня прасіў. А што, прыкольна, кажу, яшчэ чаго дасылай.